Bedside Guide பதிவிறக்க மற்றும் பயன்பாட்டு உடன்படிக்கை

பதிப்பு 2026.6 (25 ஒக்டோபர் 2026 முதல் அமுலுக்கு வருகிறது)

உங்கள் கட்டிலருகே தாள்களை அச்சிடுவதற்கு முன்னர் பின்வரும் நியதிகளைத் தயவுசெய்து பரிசீலித்து உறுதிப்படுத்துங்கள். Bedside Guide கட்டிலருகே தாள் உருவாக்கியில் பெட்டியில் குறியிட்டு ஒரு தாளை அச்சிடுவதன் மூலம், உங்கள் சார்பாக அல்லது நீங்கள் பிரதிநிதித்துவப்படுத்தும் நிறுவனத்தின் சார்பாக இந்த உடன்படிக்கைக்குக் கட்டுப்பட நீங்கள் இணங்குகிறீர்கள்.

1. வர்த்தக முத்திரை மற்றும் பயன்பாட்டு உரிமம்

Timertag® என்பது ஐக்கிய அமெரிக்கா, ஐரோப்பிய ஒன்றியம், ஐக்கிய இராச்சியம், இந்தியா, சீனா, அவுஸ்திரேலியா மற்றும் நியூசிலாந்து ஆகியவற்றில் Senver Holdings Pty Ltd இன் பதிவுசெய்யப்பட்ட வர்த்தக முத்திரையாகும்; இது Senver Group Pty Ltd (ABN 90 622 761 380) இனால் உரிமத்தின் கீழ் பயன்படுத்தப்படுகிறது. கட்டிலருகே தாள்கள் வர்த்தக முத்திரைச் சட்டத்தினால் பாதுகாக்கப்படும் உத்தியோகபூர்வ Timertag வர்த்தகநாம அடையாளங்களையும் இலச்சினைகளையும் கொண்டுள்ளன. Bedside Guide கட்டிலருகே தாள் உருவாக்கி மூலம் உருவாக்கப்பட்ட கட்டிலருகே தாள்களை நோயாளர் பராமரிப்பில் பயன்படுத்துவதற்காக மாத்திரம் அச்சிட்டுக் காட்சிப்படுத்துவதற்கான தனியுரிமையற்ற, மீளப்பெறக்கூடிய உரிமம் உங்களுக்கு வழங்கப்படுகிறது. Bedside Guide நோயாளர் பராமரிப்பில் கட்டணமின்றிப் பயன்படுத்தக்கூடியது; இது மீள்விற்பனைக்கானதல்ல. நீங்கள் கட்டிலருகே தாள்களையோ அவை கொண்டுள்ள வர்த்தகநாமச் சொத்துக்களையோ விற்கவோ, மீள்விற்கவோ, அவற்றுக்குக் கட்டணம் அறவிடவோ கூடாது; அத்துடன் அச்சொத்துக்களை மாற்றவோ தவறாகச் சித்தரிக்கவோ கூடாது.

தாள் உருவாக்கியைப் பயன்படுத்தி உங்கள் நிறுவனத்தின் பெயரையும் இலச்சினையையும், உங்கள் விடுதியின் பெயரையும், உங்கள் ஆலோசனைக்கு அழைக்க வேண்டிய இலக்கத்தையும் நீங்கள் சேர்க்கலாம். அப்பதிவுகளைத் தவிர, தாள் மாற்றப்படவோ, மீள வரையப்படவோ, மீள வர்ணமிடப்படவோ, வெட்டப்படவோ, அதன் மேல் அச்சிடப்படவோ கூடாது; QR குறியீடு மறைக்கப்படவோ, அளவு மாற்றப்படவோ, இடமாற்றப்படவோ கூடாது.

2. கட்டிலருகே தாளின் பயன்பாடு

கட்டிலருகே தாள், நோயாளரும் அவரது குடும்பத்தினரும் காணக்கூடிய வகையில், சுவரிலோ கட்டிலின் தலைப்பக்கத்திலோ காட்சிப்படுத்தப்படுகிறது. அது எந்தவொரு மருத்துவ நுகர்பொருளுடனோ, குழாயுடனோ, கட்டுடனோ இணைக்கப்படுவதில்லை. அது திறக்கும் வழிகாட்டல் புற IV குழாய்கள், சிறுநீர்க் கதீற்றர்கள் மற்றும் கட்டுகளை உள்ளடக்குகிறது; இவற்றில் ஒன்றை நோயாளர் கொண்டிருக்கக்கூடிய எந்தவொரு கட்டிலுக்கும் இத்தாள் பொருத்தமானது.

உங்கள் விடுதியில் தாள்கள் எங்கே காட்சிப்படுத்தப்பட வேண்டும் எனத் தீர்மானிப்பதற்கும், ஒவ்வொரு தாளிலுமுள்ள ஆலோசனைக்கு அழைக்க வேண்டிய இலக்கத்தை நடப்பானதாக வைத்திருப்பதற்கும், சேதமடைந்த, மங்கிய அல்லது காலாவதியான எந்தவொரு தாளையும் மாற்றுவதற்கும் நீங்களே பொறுப்பாவீர்கள்.

3. சிகிச்சைசார் பொறுப்பு பற்றிய ஏற்றுக்கொள்ளல்

Bedside Guide கட்டிலருகே தாள்கள் தகவல் வழங்கும் மற்றும் கல்விசார் உதவிச் சாதனங்கள் மாத்திரமே. அவை மருத்துவ நுகர்பொருளையோ நோயாளரையோ அவதானிப்பதில்லை; நேரத்தை அளவிடுவதோ கண்காணிப்பதோ இல்லை; பணியாளர்களை எச்சரிப்பதோ அவர்களுக்கு அறிவிப்பதோ இல்லை; நோயாளர் தரவுகளைச் செயலாக்குவதில்லை; சிகிச்சைசார் அவதானிப்புக்கோ தீர்மானிப்புக்கோ பதிலீடாவதுமில்லை. ஒரு தாளைக் காட்சிப்படுத்துவது சிகிச்சைசார் அவதானிப்பு அட்டவணைகளை மாற்றுவதில்லை. Bedside Guide ஒரு மருத்துவ சாதனமல்ல; அது மருத்துவ ஆலோசனை, சிகிச்சைசார் மேற்பார்வை, நோயறிதல்சார் கண்காணிப்பு அல்லது நேரடி நோயாளர் பராமரிப்பு முகாமைத்துவம் எதனையும் வழங்குவதுமில்லை.

• பராமரிப்புக் கடப்பாடு: கட்டிலருகே தாள்களைக் காட்சிப்படுத்தும் சுகாதாரத் தொழில்வாண்மையாளர், சிகிச்சை நிலையம் அல்லது நிறுவனம், தாள்கள் எவ்வாறு பயன்படுத்தப்படுகின்றன, பணியாளர்கள் அல்லது நோயாளர்கள் அவற்றுடன் எவ்வாறு ஊடாடுகின்றனர், அதன் விளைவாக ஏற்படும் சகல சிகிச்சைசார் பெறுபேறுகள் ஆகியவற்றுக்கான ஏகமானதும் முழுமையானதுமான சிகிச்சைசார் பொறுப்பைத் தொடர்ந்தும் கொண்டிருக்கும்.
• பயனர் இடர் மதிப்பீடு: இந்தத் தாள்கள் உங்களுடைய குறிப்பிட்ட செயற்பாட்டு, சுகாதாரப் பராமரிப்பு அல்லது மருத்துவச் சூழலுக்குப் பொருத்தமானவையா என்பது தொடர்பாக நீங்கள் உங்களுடைய சொந்தச் சுயாதீனமான சிகிச்சைசார் இடர் மதிப்பீட்டை மேற்கொண்டுள்ளீர்கள் என்பதை ஏற்றுக்கொள்கிறீர்கள்.

Senver Group Pty Ltd கட்டிலருகே தாள்களைக் காட்சிப்படுத்துதல், அவற்றை வைத்தல் அல்லது அவற்றில் தங்கியிருத்தல் தொடர்பான எந்தவொரு மருத்துவத் தவறுகள், பாதகமான சுகாதார நிகழ்வுகள், நோயாளர்களின் தவறான புரிதல்கள், சிகிச்சைத் தாமதங்கள் அல்லது காயங்களுக்குமான சகல பொறுப்புகளையும் மறுதலிக்கிறது.

4. அடையாளப்படுத்தல், நோயாளர் தகவல்கள் மற்றும் எழுத்துமூலப் பதிவுகள்

Bedside Guide எதனையும் அடையாளப்படுத்துவதில்லை. கட்டிலருகே தாள் நோயாளர் அடையாளங்காட்டியையோ வேறு எந்த நோயாளர் தகவலையோ கொண்டிருப்பதில்லை. நீங்கள் பின்வருவனவற்றுக்கு இணங்குகிறீர்கள்:

• நிலையக் கொள்கையினால் அல்லது சட்டத்தினால் தேவைப்படுத்தப்படும் எந்தவொரு அடையாளப்படுத்தல், பொருத்திப் பார்த்தல் அல்லது சரிபார்த்தல் படிமுறையாகவோ அதற்குப் பதிலாகவோ கட்டிலருகே தாள்கள் பயன்படுத்தப்பட மாட்டா;
• தாளில் எதுவும் எழுதப்பட மாட்டாது: நோயாளரின் பெயர், அடையாளங்காட்டி, அறை இலக்கம் அல்லது வேறு நோயாளர் தகவல் எதுவும் எழுதப்பட மாட்டாது;
• தாள் உருவாக்கியில் உள்ளிடப்படும் ஆலோசனைக்கு அழைக்க வேண்டிய இலக்கம் உங்கள் பராமரிப்புக் குழுவின் அல்லது விடுதியின் இலக்கமாகவே இருக்கும்; ஒருபோதும் நோயாளரின் இலக்கமாக இருக்காது.

நீங்கள் உள்ளிடும் விடுதியின் பெயரும் ஆலோசனைக்கு அழைக்க வேண்டிய இலக்கமும் QR குறியீட்டில் "#" குறிக்குப் பின்னர் வைக்கப்படுகின்றன. உலாவிகள் ஒரு முகவரியின் அப்பகுதியை எமது சேவையகங்களுக்கு அனுப்புவதில்லை; எனவே நாம் அவற்றை ஒருபோதும் பெறுவதில்லை.

5. இணைப்புநிலை, புவியியல் தடுப்பு மற்றும் முறைமை கிடைக்கும்தன்மை

ஒரு கட்டிலருகே தாளின் நடைமுறைப் பயன்பாடு, அதன் இணையவழி வழிகாட்டலை அணுகுவதற்கான நோயாளரின் ஆற்றலிலேயே முழுமையாகத் தங்கியுள்ளது. Senver Group Pty Ltd பின்வருவனவற்றுக்கு உத்தரவாதமளிக்க முடியாது:

• நோயாளரிடம் அல்லது குடும்ப உறுப்பினரிடம் QR குறியீட்டை ஸ்கேன் செய்வதற்குச் செயற்படும் இணைய இணைப்பு அல்லது இசைவான கையடக்கச் சாதனம் இருக்கும் என்பது;
• உள்ளூர்த் தொலைத்தொடர்புச் செயலிழப்புகள், பிரதேச இணையத் தடங்கல்கள் அல்லது சர்வதேசப் புவியியல் தடுப்பு ஆகியவை அணுகலைக் கட்டுப்படுத்தக்கூடும் என்பதால், இணையவழி வழிகாட்டல் சகல பிரதேசங்களிலும் முழுமையாக அணுகக்கூடியதாக இருக்கும் என்பது;
• வழிகாட்டல் பக்கங்கள் தொடர்ச்சியாகவும் தடங்கலின்றியும் கிடைக்கும் என்பது. நோயாளர்களால் QR குறியீட்டை ஸ்கேன் செய்ய முடியாதவிடத்து, பொருத்தமான சிகிச்சைசார் மாற்றேற்பாடுகளும் அவர்கள் ஆலோசனை பெறுவதற்கான பிற வழிகளும் இருப்பதை உறுதிசெய்வதற்கு நீங்கள் மாத்திரமே பொறுப்பாவீர்கள்.

ஸ்கேன் செய்வதற்குக் கணக்குகள், உள்நுழைவுகள் அல்லது நோயாளர் அடையாளங்காட்டிகள் எதுவும் தேவையில்லை; வழிகாட்டல் பக்கங்கள் நோயாளர் தகவல்களை உள்ளிடுவதற்கான எந்த வசதியையும் வழங்குவதில்லை. எந்தவொரு இணையப் பக்கத்தையும் போலவே, பக்கத்தை வழங்குவதற்காக IP முகவரி, உலாவி வகை போன்ற நியமத் தொழில்நுட்பத் தகவல்கள் செயலாக்கப்படுகின்றன. வழிகாட்டல் பக்கங்களின் உள்ளடக்கம் காலத்துக்குக் காலம் இற்றைப்படுத்தப்படலாம்.

6. அச்சிடல்

கட்டிலருகே தாள்கள் அலுவலக அச்சுப்பொறியில், A4 அல்லது US Letter காகிதத்தில், 100% அளவுவிகிதத்தில் (உண்மையான அளவில்) அச்சிடப்படுகின்றன. அவற்றை லெமினேட் செய்யலாம் அல்லது ஒளிபுகும் உறையொன்றினுள் வைக்கலாம்.

அச்சுப்பொறிகள் வேறுபடுவதனால், Senver Group Pty Ltd வடிவமைப்பு ஓரங்கள் அல்லது நிறப் பொருத்தம் ஆகியவற்றுக்கு உத்தரவாதமளிப்பதில்லை. அச்சிடப்பட்ட ஒவ்வொரு தாளையும் காட்சிப்படுத்துவதற்கு முன்னர் அதனைச் சரிபார்ப்பதற்கும், அதன் QR குறியீட்டைத் தொலைபேசியால் சோதனை ஸ்கேன் செய்வதற்கும் நீங்களே பொறுப்பாவீர்கள்.

7. நடப்புத் தாள்கள்

நோயாளர் வழிகாட்டல் இணையவழியில் உள்ளதால், தாளிலுள்ள QR குறியீடு எப்போதும் நடப்பு வழிகாட்டலையே திறக்கும். உங்கள் விடுதியின் விவரங்கள் மாறும் போதெல்லாம், பழைய தாள்களைப் பிரதியெடுப்பதற்குப் பதிலாக, தாள் உருவாக்கியில் புதிய தாள்களை உருவாக்குங்கள். முன்னர் அச்சிடப்பட்ட தாள்களின் வடிவமைப்பு அல்லது சொல்லமைப்பு தொடர்ந்தும் நடப்பானதாக இருக்கும் என Senver Group Pty Ltd எந்த உறுதிப்பாட்டையும் வழங்குவதில்லை.

இந்த உடன்படிக்கையின் பதிப்பு 2026.5 இன் கீழ் 25 ஒக்டோபர் 2026 இற்கு முன்னர் அச்சிடப்பட்ட Timertag Go லேபல்களும் QR குறியீடுகளும் தொடர்ந்தும் நோயாளர் வழிகாட்டலைத் திறக்கும்; பதிப்பு 2026.5 அவற்றுக்குத் தொடர்ந்தும் ஏற்புடையதாகும். Timertag Go லேபல்கள் இனிமேல் வழங்கப்படுவதில்லை. ஒரே நிலையத்தில் Timertag (IFU-TTP-006) மற்றும் Timertag Go ஆகிய இரண்டும் பயன்பாட்டில் இருக்குமிடத்து, அவை வெவ்வேறு உற்பத்திகளாகும்; ஒன்றுக்குப் பதிலாக மற்றொன்றைப் பயன்படுத்த முடியாது.

8. பொறுப்பு வரையறை மற்றும் நுகர்வோர் உத்தரவாதங்கள்

• நியதிச்சட்ட விலக்கு: Australian Consumer Law (அவுஸ்திரேலிய நுகர்வோர் சட்டம்) (Competition and Consumer Act 2010 (Cth) (போட்டி மற்றும் நுகர்வோர் சட்டம் 2010 (பொதுநலவாயம்)) இன் அட்டவணை 2) அல்லது உடன்படிக்கை மூலம் விலக்கவோ, கட்டுப்படுத்தவோ, மாற்றியமைக்கவோ முடியாத ஏற்புடைய வேறு ஏதேனும் நியதிச்சட்டத்தினால் வழங்கப்படும் எந்தவொரு நுகர்வோர் உத்தரவாதத்தையோ, உரிமையையோ, பரிகாரத்தையோ இந்த உடன்படிக்கையிலுள்ள எதுவும் விலக்கவோ, கட்டுப்படுத்தவோ, மாற்றியமைக்கவோ மாட்டாது.
• வரையறை: சட்டத்தினால் அனுமதிக்கப்படும் உச்ச அளவுக்கு, மேற்கூறிய நியதிச்சட்ட ஏற்பாடுகளுக்கு உட்பட்டு, கட்டிலருகே தாள்களை அல்லது அவற்றின் அடிப்படைச் சேவைகளைப் பயன்படுத்துவதிலிருந்து அல்லது பயன்படுத்த இயலாமையிலிருந்து எழும் எந்தவொரு நேரடி, மறைமுக, தற்செயலான அல்லது விளைவான சேதங்களுக்கும் (அச்சிடல் செலவுகள், தாள்களை மீள அச்சிடுவதற்கான செலவுகள், சிகிச்சைசார் பொறுப்புகள், ஒழுங்குறுத்தல் சார் பிரச்சினைகள் அல்லது வணிகத் தடங்கல்கள் உள்ளடங்கலாக, ஆனால் அவற்றுக்கு மாத்திரம் மட்டுப்படுத்தப்படாமல்) Senver Group Pty Ltd பொறுப்பாகாது.

9. இழப்பீடு

சட்டத்தினால் அனுமதிக்கப்படும் உச்ச அளவுக்கு, கட்டிலருகே தாள்களைக் காட்சிப்படுத்தும் நிறுவனம், கட்டிலருகே தாள்களை அந்நிறுவனம் காட்சிப்படுத்துதல், வைத்தல் அல்லது சிகிச்சைசார் ரீதியாகப் பயன்படுத்துதல் ஆகியவற்றிலிருந்து எழும் அல்லது அவற்றின் விளைவாக ஏற்படும் — ஒரு தாளை அடையாளப்படுத்தல், பொருத்திப் பார்த்தல் அல்லது சரிபார்த்தல் படிமுறையாகப் பயன்படுத்துதலும், ஒரு தாளில் எழுதப்பட்ட அல்லது வேறு விதத்தில் பதிவுசெய்யப்பட்ட எந்தவொரு நோயாளர் தகவலும் உள்ளடங்கலாக — எந்தவொரு மூன்றாம் தரப்புக் கோரிக்கைகள், பொறுப்புகள், இழப்புகள், சேதங்கள், செலவுகள் அல்லது செலவினங்களிலிருந்தும் அவற்றுக்கு எதிராகவும் (நியாயமான சட்டக் கட்டணங்கள் உள்ளடங்கலாக) Senver Group Pty Ltd ஐயும், அதன் பணிப்பாளர்கள், உத்தியோகத்தர்கள் மற்றும் ஊழியர்களையும் இழப்பீடு செய்வதற்கும், அவர்கள் சார்பில் வழக்காடுவதற்கும், அவர்களைப் பாதிப்பின்றிக் காப்பதற்கும் இணங்குகிறது.

10. ஆளுகைச் சட்டம் மற்றும் நியாயாதிக்கம்

இந்த உடன்படிக்கை, நீங்கள் கட்டிலருகே தாள்களைப் பயன்படுத்துதல், மற்றும் அடிப்படைச் சேவைகளிலிருந்து அல்லது அவை தொடர்பாக எழும் எந்தவொரு பிணக்குகளும் அவுஸ்திரேலியாவின் நியூ சவுத் வேல்ஸ் சட்டங்களினால் மாத்திரமே ஆளப்படுவதுடன், அவற்றுக்கு அமைவாகவே பொருள்கோடல் செய்யப்படும். நியூ சவுத் வேல்ஸ் நீதிமன்றங்களினதும், அந்நீதிமன்றங்களிலிருந்தான மேன்முறையீடுகளை விசாரிக்கத் தகுதிவாய்ந்த எந்தவொரு நீதிமன்றங்களினதும் தனியான நியாயாதிக்கத்துக்கு நீங்கள் மீளப்பெறமுடியாதவாறு கீழ்ப்படிகிறீர்கள்.

11. பொது ஏற்பாடுகள்

• பிரிக்கத்தக்கமை: இந்த உடன்படிக்கையின் ஏதேனும் ஏற்பாடு நீதிமன்றமொன்றினால் வலிதற்றது அல்லது வலுவுறுத்த முடியாதது எனக் காணப்படின், அத்தகைய வலிதின்மை அல்லது வலுவுறுத்த முடியாமை உடன்படிக்கையின் எஞ்சிய பகுதியைப் பாதிக்காது; அது முழு வலுவுடனும் விளைவுடனும் தொடர்ந்து நடைமுறையில் இருக்கும்.
• முழு உடன்படிக்கை: இந்த உடன்படிக்கை, Bedside Guide கட்டிலருகே தாள்கள் தொடர்பாக உங்களுக்கும் Senver Group Pty Ltd க்கும் இடையிலான முழுமையான புரிந்துணர்வை அமைப்பதுடன், முன்னைய சகல வாய்மொழி அல்லது எழுத்துமூல எடுத்துரைப்புகளையும் பதிலீடு செய்கிறது.
• திருத்தங்கள்: இத்தளத்தில் இடப்பட்டுள்ள பதிப்பை இற்றைப்படுத்துவதன் மூலம் எந்நேரத்திலும் இந்த நியதிகளைத் திருத்துவதற்கான உரிமையை Senver Group Pty Ltd ஒதுக்கி வைத்துள்ளது. திருத்தமொன்றின் பின்னர் கட்டிலருகே தாள்களைத் தொடர்ந்து பயன்படுத்துவது, திருத்தப்பட்ட நியதிகளை ஏற்றுக்கொண்டதாக அமையும்.